Святая Гора, Афон

 

апрель 2020 г. / 40-уст

сентябрь 2019 г. / 40-уст

 

Свято-Пантелеимонов монастырь

 

Плач Пресвятой Богородицы

Стояше днесь при Кресте, Пречистая Дево,
Умиленный плач сподвизаше, сладчайший глас испущаше.
О Свете Пресветлый, Заре присносущная,
Где Твоя зайде красота, светолучная невечерняя,
Добровидный Сыне Мой, Сладчайшая Доброта,
Где Твой вожделенный лица зрак, Краснейший Свете Мой.
О Божия мудросте, церковная сладосте,
Что се вижу зде, преславное видение ужасное.
О Свете великий, Сладчайший Иисусе,
Где Твоя доброта сокрыся, возлюбленне Сыне Мой.
Увы Мне, Свете мой, дражайшая доброта,
Како Тя узрю, Христе Царю, на Кресте Тя распинаема.
О солнце пресветлое, сокрый ныне лучи своя,
Виде своего Создателя, неправедно зде ныне страждуща.
Иосифе преблаженне, сними тело Иисусово,
Положи е в гробе нове, изсечене из камене.
Где Твой зрак пресладкий, Сладчайшая Доброта,
Како погребу, Тя Сыне Мой, безсмертнаго и предвечнаго.
Не рыдай Мене Моя Мати, восстану бо из гроба,
Тебе вознесу со славою, превыше всех горних и земных.
Воскресни Боже Сыне Мой, тридневно от гроба,
Взыди ко Отцу на небеса, судя и концем всей земли.
Тогда Тебе всяка тварь, небесных и земных,
Поклонится и прославит, Царя веком и Зиждителя.